Ina-Xaabsadow mari maysid

Waxaa yimid Puntland Maxamed Cabdi Xaashi, oo ahaa Madaxweyne ku-xigeenkii hore ee Puntland, wuxuuna ka soo dagay magaalada Bosaaso isagoo ka yimid dalka Mareykanka sidaan horey idiinku sheegnay. Markii ay timid dayaaradii uu la socday oo uu ka soo raacay Dubay, ayaa waxaa soo dhoweeyey xubno fara badan oo ka tirsan golaha wakiilada iyo saaxiibadiisii ku soo dhiirigaliyey inuu yimaado oo kala ahaa Gen. Cabdi Cali Shire, Careys, Saciid Caduur. Kooxdani aad ayey u faraxsanaayeen waxayna aaminsanyihiin inay guuleysteen. Nasiib daro waxaa noqotay inaysan tegin gegidii dayaaradaha Col. Cabdullaahi Yuusf iyo Ina-Xaabsadeba .

Taasi waxay cadeysay siyaasad xumada Ina-Yeey iyo ninkuu la rabay inuu noqdo Madaxweyne ku-xigeenkiisa, maadaama uu kala soo qeyb qaatay jabkii iyo jidgooyadii la soo daristay 9kii bilood ee uu dibad mayrka ahaa. Ina-Xaabsade waxaa la soo marsiin waayey beesh Dhulbaahante oo cadeysay haddii la magacaabo inay gidigood dhaqaajinayaan. Hase yeeshee beeshu waxaysan ogeyn balankii lala soo galay tigreega oo ahaa in la magaaco Ina-Xaabsade maadaama ay beeshiisu ay degaan Ethiopia, halkaasna si fudud looga hogaamin karo maadaama ay yaqaanaan dhaqanka Tigreega.

Maadaama uu Ina-Xaabsade degan yahay rugtii madaxtooyada ee loogu talagaly Madaxwene ku xigeenkii hore, Maxamed Cabdi Xaashi waxaa la dejiyey Hotel Kamaal. Maadaama, Maxamed Cabdi xaashi ay wataan rag miisaan culus, suuragal noqon mayso in la shirqoolo si loo dilo. Dhibaatada kale ee jirtaa waxay tahay Jacfar oo siduu Ina-Yeey ka soo balanqaaday xertii timaha weyneyd in uu ka dhigi doono Madaxweyne ku xigeen haddii ishaaradoodu suura gasho, ayaa iyana ah caqabad kale. Ina-Xaabsade ayaa ku hanjabay inuu aadayo Somaliland, durbadiiba wuxuu iloobay dambiguu ka soo galay gobolkaas oo wuxuu moodaa in uu dambi ka soo galay Cigaal oo kaliya. Intaas waxaa sii dheer Seefta banaanka iyo Ka sii gaab oo maxbuus ku ah Garowe oo ka baxday farihii ina-Yeey. Bal hada qaboo ciidamadii laga balan qaaday inay jano galayaan ayaa iyaguna la carara maalin walba qoryaha oo iibiya dabadeedna u baxsada degaankay ka yimaadeen markay waayeen male awaalkoodii. Markay huwantaasu u dacwiyaan ina-Yeey ayuu u qaadaa gabaygii ahaa "Guguulihiiyow hadaad gu'ga u ooyeyso, hadaad moodey kelidaa inuu gubayo jiilaalku", ayey inta yaabaan candhuuftooda dib u liqaan oo yiraahdaan "Meereysanoo quman baan ka qaylineynee ma hadaan galay qaama qowseyn".

Wararkii todobaadkii tegay

Aabi-weyraxii labaad ee ina-Yeey

Col. Cabdullaahi Yuusuf ayaa diyaariyey ciidan gaaraya ilaa iyo 1000 askari, oo sida warar lagu kalsoon yahay ay sheegayaan ay ujeedadoodu tahay inay qabsadaan Magaalada Garowe. Weli lama hubo in ciidankaasi uu mari doono duleedka magaalada Qardho iyo in aysan ujeedadiisu ahayn Garoowee ay tahay inuu qabsado magaalada Qardho. Warar xogogaal ah ayaa iyaguna cadeynaya in sarkaaladii Tigreega ahaa ee dhowaan ugu yimid magaalada bosaaso ay kula taliyeen inuu Garoowe qabsado maadaama uu xuduudka Ethiopia ka dhow yahay jiida nugaal ama meesha loo yaqaan birta oo u muuqata Garowe, si loo soo gaarsiiyo wixii hub iyo taageero ah ee Coleneylku u baahdo.

Weli waxaan la hubin cidii uu kaga tegi lahaa magaalada bosaaso oo joogaan ciidan aad u fara badan, hub culusna uu yaalo. Dadka ka faalooda dagaal gelinta ciidamada ayaa iyaguna sheegaya in ay ujeedadiisu tahay haddii uu Garowe qabto uu fursa u helayo in ciidamadiisu labada dhinac kaga imanayaan magaalada Qardho, oo ay fududaan doonto gacan ku dhigeedu. Sida ay sheegayaan ciidamada dowlada Puntland ee aagaga Qayaadsame, Dhuudo, Isku-shuban, Garowe iyo Laascaanood, ayaa aad ugu diirsaday xogtaas ka soo baxday huwanta ina-Yeey bilaabayna jala buteyn. Siday nagu soo gaareen xogo hoose oo aan ka helay ciidamadaas ayaa iyaguna qorsheynaya hadii huwantaas uu Col. Cabdullaahi yuusuf hogaaminayo ay u soo ambabaxaan dhinacooda ama ay isku dayaan inay maraan jiida amaba Qardho oo ay adag tahay labadaba inuusan gaareyn Garowe. Isla markaana waxay waraku cadeynayaan in qeyb ka mid ah ciidamadaas loo qorsheeyey inay u soo daba maraan magaalada Bosaaso oo ay gacanta ku dhigaan. Loogow looba jooge!.

Madaxweyne ku-xigeenkii hore Maxamed Cabdi Xaashi
oo khamiistii Bosaaso yimid.

Maalinimadii khamiista ayaa waxaa gegida dayaaradaha ka soo degay Madaweynihii hore ee Puntland, shacabka reer Puntland-na ma jecleysan imaatinkiisa oo waxay bidayeen inuu yahay nin aqoon leh oo fahmi kara micnaha Axdigii dhignaa ee Puntland. Maxamed Cabdi Xaashi oo ka ambabaxay Puntland markay maradii ka dhacday ina-yeey, ayaa sida wararku sheegayaan cadaads kaga yimid Cabdi Cali shire, Siciid Caduur iyo Careys siduu u iman lahaa Bosaaso. Kooxdan oo aad isugu xiran ayaa la rumeysan yahay inay ahaayeen kuwii ka dambeeyey afgambigii kolkii hore ku dhacay Col. Cabdullaahi Yuusuf, hase yeeshee uu ka dhicisoobay markuu Jaamac Cali Jaamac oo aan la fileyn ka soo dagay Bosaaso, cadeyeyna inuu is-sharxo. Kooxdan waxay doonayeen in si aan la garan karin ay kaga takhalusaan ina-Yeey, cadeystaana bareerahooda markay dalka ka saaraan. Markii uu qorshahoodii ka xumaaday ayaa waxay dani ku qasabtay inay taageeraan, hase yeeshee ina-Yeey wuu ka warqabaa falkoodaas waana arrinta ku kaliftay inuu u ololeeyo noqoshada jagada Madaweyne ku-xigeenka Ina-xaabsade.